Thursday, April 16, 2015

የኢትዮጵያውያን አሳፋሪ ስቃይ መቼ ይሆን የሚያበቃው?




Share/Bookmark


የእኛው፣ የኢትዮጵያውያን ሰቆቃ ተነግሮ አያልቅም፡፡ቢፃፍ…ቢፃፍ…ቢፃፍ…መቋጫ የለውም፡፡ደሞ መግለፅ ከምችለው በላይ አሳፋሪ ነው፤ቅስም የሚሰብር አሳዛኝም ነው፡፡ክፉኛ የተሰበረው ልባችን፣እርር…ድብን ብሎ የተቃጠለው አንጀታችን፣ውጋ! ንቀል! ውጋ! ንቀል!እያሉ ያቆሰሉት ገላችን ሳይድን መልሰው መላልሰው እየወጉት… እንሆ ዛሬም በደም እየታጠበ ይገኛል፡፡

የጦርነትና የርሃብ ተምሳሌት ነን፡፡ዓለምን ጉድ ባሰኘ ድህነትና ኋላ ቀርነት እንታወቃለን፡፡የለየላቸው አምባገነኖች በማፍራትና እርሰ በርሳችን በመገዳደል ታሪካችን አናፍርም፡፡እንዳውም፣ አንዱ ጥጋበኛ መጥቶ በሌላ የእርሰ በርስ የመገዳደል በዓል እስኪተካው ድረስ በየዓመቱ በድምቀት እናከብራለን፡፡‹‹ገዳይ ዬ…ገዳይ ዬ…›› የሚለው ሐረግ ከዘፈኖቻችን አይጠፋም፡፡ገዳዮችን የምንክብበት መለያ መዝሙራችን ነው፡፡

ሴራ፣ተንኮል፣ምቀኝነት የእኛ መገለጫዎች ናቸው፡፡ብንተባበር እንደ ዝንጀሮ መንጋ የተከመረውን እናፈርሳለን እንጂ የፈረሰውን አንገነባም፡፡የክፋት መለያዎቻችን ከቀን ወደ ቀን በብዛትም በጥራትም እየጨመሩ ይገኛሉ፡፡በገፍ ከሃገር መሰደድና የውርዴት ሰለባዎች መሆን መታወቅያችን ከሆነ ሰነባብቷል፡፡

2004 ዓመተ ምህረት(ዓመተ ፍዳ ወይስ ዓመተ ምህረት?)

አዎ፤ለማሳጠር ያህል ከ2004 ዓ.ም ልጀምር፡፡ወሩ የካቲት ነበር፤ ዓመተ ምህረቱ 2004፡፡ሶስት ወይም አራት የሚሆኑ ዓረብኛ ተናጋሪ ጎልማሶች በሆነ ዛፍ ላይ ጥለው ከዚህም ከዚያም ሲጎነታትሏት ይታያል፡፡ልጅትዋ በወደቀችው ሆና ‹‹አይ!አይ…››እያለች ታቃስታለች፤ ታለቅሳለች፡፡በመጨረሻ ላይ፣ በሐይል ጎትተው ወደ መኪና ሊያስገቧት ሲታገሉ ‹‹ኖ…ኖ…ኖ! ወይኔ…››እያለች ስትጮህ ይሰማል፡፡ሃገሯ ኢትዮጵያ የመኖር ተስፋዋን የነፈገቻት ወጣት ዓለም ደቻሳ ነበረች፡፡ዓለም እንደ በግ በአደባባይ ስትጎተት፣ ሰብአዊ መብትዋ በጠራራ ፀሐይ ሲገሰስ፣ ጭኾትዋ ሰሚ አጥቶ ስታቃስት የሚያሳይ ቪድዮ ታዋቂ መገናኛ ብዙሓን ሲቀባበሉት አይተናል፡፡ይህ አሳዛኝ ትዕይንት የተከሰተው ሊባኖስ በሚገኘው የኢትዮጵያ ኢምባሲ አጠገብ ነው፡፡

ከአንድ ሳምንት በኋላ ዓለም ደቻሳ ዓለም በቃኝ ብላ ራሷን እንዳጠፋች ተሰማ፡፡አንጀት የሚያቃጥል፣ ልብ የሚሰብር ክስተት ነበር፡፡

በወርሐ ሰኔ 2004 ዓ.ም ደሞ፣ በሕገ ወጥ መንገድ በኮንቴነር ታሽገው ከተንዛንያ ወደ ማላዊ በመጓዝ ላይ የነበሩ 45 ኢትዮጵያውያን የሚተነፍሱት ኦክስጅን አጥተው ለህልፈት እንደተዳረጉና 72 የሚሆኑ ደሞ አሳሳቢ የጤና እከል እንደደረሰባቸው ሰምተን ከልባችን አዝነናል፡፡

መስከረም 2005 ዓመተ ምህረት

ሶስት ኢትዮጵያውያን በጭካኔ የተገድለዋል ፡፡ብዙ ሴቶች የአስገድዶ መደፈር ጥቃት ደርሶባቸዋል፡፡ወጣት ሴቶችና ወንዶች ጀለብያ በለበሱ ዓረቦች ታስረው ሲገረፉ አይተናል፡፡በፖሊሶች ቆመጥ ሲዠለጡ ተመልክተናል፡፡የመኪና ጎማ አንስተው በአናታቸው ላይ ሲጥሉባቸው የሚያሳዩ ቪድዮዎች ፌስቡክን አጥለቀልቀውት ነበር፡፡ብዙዎች የአካል ጉዳት ደርሶባቸዋል፡፡

ውሎ አድሮ ግን ከ150 ሺ በላይ ኢትዮጵያውያን ለዓመታት ሰርተው ያፈሩት ንብረት ተዘርፈው፣ከሳውዲ ዓረብያ ታፍሰው ወደ ሃገራቸው እንዲመለሱ ተገድዷል፡፡እምባ እየተናነቀን፣ በእልህና በቁጭት እየተቃጠልን መርዶውን የተከታትለነዋል፡፡ሆኖም ግን፣ መቋጫ አላበጀንበትም፡፡

ሐምለ 2005 ዓመተ ምህረት፡- ቢቢሲ ከየመን በሰፊው የዘገበው የኢትዮጵያውያንሰቆቃ አንብበናል፡፡ኢትዮጵያውያኑ በህገ ወጥ ደላሎች አማካኝነት ቀይ ባሕርን በትናንሽ ጀልባዎች ከተሻገሩ በኋላ የመን ሲደርሱ የሚደርስባቸው ግድያ፣ግርፋትና የአስገድዶ መደፈር መከራ ማንበብ አሳፋሪ፣አሰቃቂና አሳዛኝ ነበር፡፡

በጥቅምት ወር፣ 2006 ዓመተ ምህረት፡- ስደተኞች ጭና ወደ የመን በማቅናት ላይ ነበረች ጀልባ ሰምጣ የ70 ኢትዮጵያውያን ህይወት ማለፉን ቢቢሲ መዘገቡ አይረሳም፡፡ 

2007 ዓመተ ምህረት፡- ባሳለፍነው የመጋቢት ወር የሳውዲ ዓረብያ የጦር አውሮፕላኖች የመንን ሲደበድቡ ከአስር በላይ ኢትዮጵያውያን መገደላቸውን ሰምተናል፡፡ 

በዚህ ሳምንት ደሞ በደቡብ አፍሪካ የስደት ኑሮ እየገፉ በሚገኙ ኢትዮጵያውያን አሰቃቂ ግድያ፣ድብደባና ዝርፍያ እየደረሰባቸው ይገኛል፡፡አስከሁን ድረስ ሶስት ኢትዮጵያውያን መገደላቸውን ሰምተናል፡፡ጥረው ግረው ያፈሩት ንብረት ተዘርፈው በመጠልያ ታጉረው የሚገኙት ብዙ ናቸው፡፡ ብዙዎችም ከአሁን አሁን ይዘርፉናል፣ይገድሉናል እያሉ በመሳቀቅ ላይ ይገኛሉ፡፡

ከእነዚህ ሁሉ አሰቃቂና አሳፋሪ ክስተቶች የምንረዳው ምንድን ነው? ወይ በሃገራችን ሰርተን አያልፍልን፣ ወይ ተሰድተን አልቀናን በሄድንበት ሁሉ መከራና ስቃይ ይፈራረቁብናል፡፡መቼ ይሆን ከዚህ ሁሉ ሰቆቃ ተገላግለን፣ እፎይይይ…ብለን በሃገራችን በኩራት የምንኖረው?


Wednesday, March 18, 2015

መጪው ጊዜ ከኢህአዴግ ጋራ እንደ ድሮው ነው




Share/Bookmark




በ1980ዎቹ ገደማ አንድ ሴትዮ የቀድሞ ጠቅላይ ሚኒስተር አቶ መለስ ዜናዊን የኢትዮጵያ ህዝብ ከአስር ዓመታት በኋላ ምን ዓይነት ኑሮ እንዲኖር እንደሚመኙለት ጠይቀዋቸው ነበር፡፡ሰውየው ሲመለሱ ‹‹የዛሬዓስር ዓመት ሁሉም የኢትዮጵያ ህዝብ በቀን ሶስት ጊዜ ምግብ ያገኛል›አሉ፡፡ያ ምኞት የቀን ቅዠት ነበር መሰለኝ ከአስር ዓመታት በኋላ ቀርቶ ከ24 ዓመታት በኋላም እውን አልሆነም፡፡በእርግጥ በኢቢሲ የምንመለከታት ኢትዮጵያ የቅር በአፍሪካ በአውሮፓም ተወዳዳሪ የሚገኝላት አትመስልም፡፡
የኢቢሲዋን ኢትዮጵያ ለኢቢሲዎች እንተዋትና እኛ ስለምንኖርባት ኢትዮጵያን እንጨዋወት፡፡


ከሶስት ዓመታት በፊት የአዲስ አበባ ህዝብን ስለሚፈታተኑ አምስት አንኳር ችግሮችን አስመልክቸ ትንሽየ መጣጠፍ ፅፌ ነበር፡፡እነዝያ ችግሮች ለብዙ ዓመታት አብሯችን ከመኖራቸው የተነሳ ነው መሰለኝ በምሬት ስንነጋገርባቸው አይስተዋልም፡፡ውሃ ለሳምንታት ይጠፋል፤መብራት በየጊዜው ይሄዳል ይመጣል፤የኑሮ ውድነቱ…የሱኳር፣የዘይትና ሌሎች አስፈላጊ ነገሮች መጥፋት፣የትራንስፖርት እጥረት፣የቤት ክራይ ዋጋ ጣራ መንካት ወዘተ ዛሬም ህዝቡን ከመጠን በላይ እየተፈታተኑት ይገኛሉ፡፡ ህዝቡ ግን ምሬቱን ሲገልፅ አይታይም፡፡ የመገናኛ ብዙሓን ስለእነዚህ ችግሮች መዘገብ አቁሟል…በጣም ከመደጋገማቸው የተነሳ ሳይሰለቻቸው አልቀረም፡፡


በአሁኑ ጊዜ ውሃና መብራት የሚጠፋው እንደ ድሮው ሳት እያለ ሳይሆን ሙሉ በሙሉ እንደሚናፈቅ አድርጎ ነው፡፡ለሳምንታት እልም ብሎ ይጠፋል፡፡መብራት ሲጠፋ ስልክ ይጠፋል…ኔትወርክ ይጠፋል…ባንኮች አገልግሎት መስጠት ያቆማሉ…ከተማው የለመደው እንዳጣ ሱሰኛ አፉን ከፍቶ ያዛጋል፡፡ማንም አይናገርም…አይጋገረም፡፡ሁሉም ዝም…ጭጭ፡፡ያው አምርሮ የሚናገር እጣው ምን እንደሚሆን ያውቃታል…እስር ቤት ወይም ስደት ነው፡፡ስለዚህ፣ የባሰ አታምጣ እያለ እንዳላየና እንዳልሰማ መስሎ ዝም ነው፡፡ህዝቡ ቢርበው ጉልበቱን አጥፎ ዝም ነው፤ቢጠማው ዝም…ኑሮው ቢከፋው ዝም…ዝም ከማለት ውጪ ሌላ አማራጭ እንደሌለው ከልምድ ተምሯልና፡፡


ኢህአዴግ በበኩሉ፣ እንደተለመደው ‹‹አበበ በሶ በላ›› እያለ ይለፍፋል፤ ‹‹መጭው ጊዜ ከኢህአዴግ ጋር ብሩህ ነው›› ይላል፡፡እንደዚህ ዓይነቱ ‹‹ካፈርኩ አይመልሰኝ›› ዓይነ ደረቅነት ይኖር ይሆን?ኢህአዴግ ከሚያቀርባቸው ለኑሮ አስፈላጊ የሆኑ ነገሮች መቼም ቢሆን እንደልብ እንደማይገኙ ይታወቃል፡፡ህዝቡ ውሃ ፍለጋ ይሰለፋል…ታክሲ ፍለጋ ይሰለፋል…የኮንደምኔም እጣ ፍለጋ ይሰለፋል…ምሬቱን ለመግለፅ ብቻ ነው እንዲሰለፍ የማይፈቀድለት፡፡ምሬቱን ለመግለፅ እንዳይሰለፍ ምን የሚያካክሉ ወጠምሾች ዱላ ይዘው ይጠባበቃሉ፡፡ሰልፍ ለመውጣት የሞከሩ እስኪያስመልሳቸው ድረስ ተጠብጥቧል፡፡መብቴ ተደፍሯል ብትል ሰሚ የለም፤ ውሃ ጠፋ ብትል ሰሚ የለም፤ፍትሕ አጣሁ ብትል ሰሚ የለም፡፡ የኢህአዴጎች የተለመደው መልስ ‹‹ እንድ አንድ ትምክህተኞች…አንድ አንድ ፀረ ሰላም ሃይሎች…አንድ አንድ ጨለምተኞች የሚያወሩት ውሸት ነው››ይላል፡፡


ቢሆንም ግን ‹‹ምርጫ›› በደረሰ ቁጥር ‹‹መጭው ጊዜ ከኤህአዴግ ጋራ ብሩህ ነው›› ይለናል፡፡ብሩህ የሆነው ምኑን ነው? መቼስ ፀሐይ የምትወጣው ኢህአዴግ ስላዘዛት ነው ማለት አይቻልም፡፡የዓይኖቻችን ብርሃን ያልጠፉት ኢህአዴግ በስልጣን ስላለ ነው ማለትም አንችልም፡፡ህዝቡ ኦክስጅን የሚተነፍሰው ኢህአዴግ እየቆነጠረለት አይደለም፡፡አንድ አንድ የአዲስ አበባ ኗሪዎች በኢቢሲ አለፋላፊነት ደስታቸው ስለገለፁ ብቻ ህዝቡ ደስተኛ ነው፤ ደልቶታል…ቁጭ ቢል ሶፋ ላይ…ቢተኛ ስፕንጅ ፍራሽ ላይ…ቢራመድ በቀይ ምንጣፍ ላይ አይደለም፡፡በእግሩ ቢራመድ ቀይ ሽብር ይገጨዋል(ሲኖትራክም ይሉታል፤ ቻይና በኢትዮጵያ ህዝብ ብዛት ተማርራ የላከችብን መዓት?)…ቢሰለፍ ሰልፉ ማለቅያ የለውም፡፡ሰልፉን እንደምንም አልቆ ታክሲ ተሳፍሮ ሲጓዝ የትራፊክ መጨናነቁ አይጣል ነው፡፡ብሩህ የሆነው የቱ ጋር ነው?


‹‹በምርጫ›› 2002 ዓ.ም ወቅት አንገብጋቢ የነበሩ ህዝቡ እረሮዎች ዛሬም እንዳሉ ናቸው፡፡ውሃ…መብራት…ስልክ…የኑሮ ውድነት…የቤት ክራይ መናር…ሱኳር…ዘይት… እያሉ ችግሮችን መዘርዘር ይቻላል፡፡አምስት ዓመት ቀላል አይደለም…በአምስት ዓመታት ውስጥ ግን አንዳቸውም አልተፈቱም፡፡የፕረስ መፃነት ታሪክ እየሆነ ነው…መታሰር፣ መንገላታት…ነበሩ አሉ፡፡ሞባሌ ተዘረፍኩ ማለት ተራ ወሬ ሆኗል፤ላፕቶፕ…መኪና…ሌሎች ትላልቅ ንብረቶች መዘረፍ እየተዘወተሩ ነውና፡፡ዘራፌዎች…ማጅራት መቼዎች…ታሰሩ ቢባል ስድስት ወር…እስከ ሶስት ዓመት ነው፡፡መብቱ ጠይቆ የሚታሰረው ግን ፍርድ ሳያገኝም ለዓመታት ይታሰራል፡፡ፀሐይ በጠለቀች ቁጥር ህዝቡ የሚሸማቀቅ ከሆነ ብርሃኑ የቱ ጋር ነው? እንደ ልብ ገብቶ መውጣት ካልተቻለ ፖሊሶቹ እንደአሸን ቢፈሱ ምን ይፈይዳሉ?


የህግ ስርዓቱ ግለ ሰዎች ለፈልጉት ጥቅም የሚያውሉት ከሆነ ህግነቱ ምኑ ላይ ነው?ዘራፊዎች፣ ማጅራት መቺዎች፣ሙሰኞች በኩራት ተንቀባርረው የሚኖሩባት ሃገር ይዘን፤ ድህነት በቁማችን ሊቀብረን የተቃረበባት ሃገር እየመሩ ስለጭው ጊዜ ብሩህነት መለፈፍ ‹‹ከሞትክ በኋላ ገነት ትገባለህ›› ከሚሉት ስብከት በምን ይለያል?ከአምስት ዓመታት በፊት የነበሩ ችግሮች ዛሬም ብሶባቸው ኑሯችን ከድጡ ወደ ማጡ የሚያደርጉት ከሆነ መጪው ጊዜም ከኢህአዴግ ጋራ ያው እንደ ድሮው ነው፡፡



Thursday, February 26, 2015

አምልኮተ መለስ




Share/Bookmark


ህወሓት የተመሰረተበት 40ኛው ዓመት የተከበረበት ቀንን ተንተርሰው የብአዴኑ አመራር አቶ በረከት ስምኦንና የህወሓቱ ከፍተኛ አመራር አቦይ ስብሓት ነጋ ስለመለስ የሰጧቸው አስተያየቶች አነጋጋሪ ሆኗል፡፡ፌስቡክን ጨምሮ የማሕበራዊ ድረገፆች ተጠቃሚዎች ሲቀባበሏቸው ሰንብቷለ፤ የየራሳቸው አስተያየቶችም ሰጥተውባቸዋል፡፡ከፊሎቹ በረከት ነው ትክክል ሲሉ፣ ከፊሎቹ ደሞ አይ አቦይ ስብሓት ናቸው ትክክል ሲሉም ተስተውሏል፡፡ለማስታወስ ያህል ሁለቱም የኢህአዴግ አመራሮች የሰጥዋቸው አስተያየቶች እንሆ፡
አቶ በረከት ስምኦን‹‹ መለስ በክፍለ ዘመን አንዴ ከሚፈጠሩ ሰዎች የሚመደብ ነው›› ሲሉ፣ አቶ ስብሐት ነጋ በበኩላቸው ‹‹የለም፣ አሁኑኑ ብዙ መለሶች መፈጠር ይችላሉ›› በማለት የአቶ በረከት አስተያየት እንደተቃወሙት ሪፖርተር ጋዜጣ ሳይቀር ዘግቦታል፡፡ለመሆኑ እነዚህ አስተያየቶች ዩነት አላቸው? ካላቸው፣ ልዩነቱ ምንድን ነው? አንድነታቸውስ ምን ድን ነው? እስኪ  የቻልነውን ያህል በጥልቀት እንመርምራቸውና ከአምልኮተ መለስ ጋራ ያላቸው ዝምድና ለማየት እንሞክር፡፡

ሁለቱም አስተያየቶች በጥንቃቄ ስንመረምራቸው ያን ያህል የጎላ ልዩነት የላቸውም፡፡አቶ በረከት ያሉት መለስን የመሰለ መሪ ለማፍራት ብያንስ አንድ ክፍለ ዘመን ይወስዳል ሲሆን አቦይ ስብሓት ግን አሁኑኑ ብዙ መለሶች መፍጠር ይቻላል ነው ያሉት፡፡በመሆኑም በሁለቱም አስተያየቶች ያለው ልዩነት የጊዜው ማጠርና መርዘም ብቻ ነው፡፡
በተረፈ ግን፣ ሁለቱም መለስን ከማድነቅ አልፈው አምላኪዎች መሆናቸውን አሌ የሚባል አይደለም፡፡የሁለቱም ፍላጎትና ፀሎት መለስን የመሰለ ‹‹መሪ›› በማፍራት ላይ ያጠነጥናል፡፡ሁለቱም በመለስ ፍፁምነት ያምናሉ፤ እንደ ጣኦት ያመልካሉ፡፡መለስን በሌላ ‹‹መሪ›› መለወጥ ማለት ሃይማኖት የመለወጥ ያህል ይቆጥሩታል፡፡በመለስ ላይ ያላቸው እይታ ምክንያታዊ ሳይሆን በጭፍን ስሜታዊነት የታወረ ነው፡፡ለዛም ነው መለስ የማይካዱ ጠንካራ ጎኖች እንደነበሩት ሁሉ፣ ማንም በቀላሉ የማይረሳቸው የዘቀጡ ስራዎች ማከናወኑም ግልፅ ሆኖ ሳለ እነሱ ግን ማስተዋል የተሳናቸው፡፡